Reykjavíkurvegur 50, Hafnarfirði 8.–10. bekkur Frá 2016
NÚ er sjálfstætt starfandi grunnskóli þar sem unglingar samtvinna íþróttaáhuga sinn og nám. Vendinám, fartölva á hvern nemanda, dagleg hreyfing — og skóladagur sem hefst í dagsbirtu.
01 Markmið
NÚ vill veita unglingum tækifæri til að samtvinna íþróttaáhuga sinn og grunnskólanám þar sem nemandinn sinnir námi sínu af sama áhuga og íþróttinni.
Með nútímatækni og nýjum kennsluaðferðum veitum við nemendum frelsi til að nálgast námið á eigin forsendum. Við viljum skapa umhverfi þar sem nemendur finna til ábyrgðar, áhuga, heilbrigði og umfram allt ánægju.
02 Hugmyndafræðin
Sú krafa að allir nemendur meðtaki allt námsefni á sama hraða er óraunhæf. Dýrmætum tíma kennara með nemendum er ekki eytt í að þylja upp staðreyndir, heldur persónulega aðstoð við námsefnið. Nemendur fá tækifæri til að nálgast námsefnið á eigin forsendum og kennarinn aðstoðar hvern og einn nemanda á þeim stað sem hann er staddur. Aukið frelsi nemenda varðandi hvaða fagi skal sinnt hverju sinni eykur að okkar mati frumkvæði og árangur.
Það að burðast með níðþunga tösku fulla af bókum til og frá skóla heyrir sögunni til. Í takt við þróun tækninnar og umhverfissjónarmið eru flest námsgögn NÚ aðgengileg í fartölvu sem hver nemandi fær til afnota. Hana notar nemandinn til þess að leysa verkefni, sitja fyrirlestra og í aðra þætti námsins.
Okkur finnst íþróttaheimurinn vera smækkuð mynd af raunveruleikanum. Íþróttamaðurinn þarf að sigrast á líkamlegum, andlegum og félagslegum hindrunum til að ná árangri. Með markvissri þjálfun, mistökum, leiðréttingum og endurtekningum nær hann tökum á grein sinni. Við viljum hjálpa nemendum að beita sama hugsunarhætti í náminu. Markmið okkar er ekki að framleiða atvinnumenn í íþróttum, heldur atvinnumenn í lífinu. Við viljum smita metnað og markmiðasetningu íþróttaumhverfisins yfir í skólaumhverfið.
Líkamleg heilsa er augljóslega mikilvæg þeim sem stunda íþróttir. Langar setustundir skólalífsins draga úr virkni og áhuga. Við leggjum því áherslu á að nemendur endurnæri sig með reglulegri hreyfingu yfir skóladaginn. Andleg heilsa er ekki síður þýðingarmikill þáttur í lífi íþróttamannsins. Hvatning og jákvætt sjálfstal eru stórir þættir í uppbyggingu sjálfstrausts og einnig stórir þættir í starfi NÚ. Hnattræn lega Íslands gerir það að verkum að bróðurpart skólaársins eru krakkar að fara í og úr skóla í myrkri. Við segjum skammdeginu stríð á hendur og hefjum skólastarfið seinna en hefðbundið þykir. Byrjaðu daginn í dagsbirtu.
03 Raddir
Þekkt íþróttafólk lýsir því hvað skóli eins og NÚ hefði þýtt fyrir það á unglingsárunum. Umsagnirnar eru af forsíðu skólans.
01 / 10
„Markþjálfun, hollur matur, dagleg hreyfing, Vá! Þetta er draumalífið maður.“
„Það er frábært að geta stjórnað námshraðanum sjálfur – vendinám er algjörlega málið!“
„Ég vildi að ég væri að fara í unglingadeild í dag.“
„Það hefði munað miklu ef skólinn minn hefði sýnt meiri skilning á því að ég var að æfa íþróttir á fullu.“
„Það er draumur allra unglinga að fá að byrja seinna á morgnanna í skólanum.“
„Fartölva á hvern nemanda er málið, samfélagið er allt að verða rafrænt.“
„Ég held að ég væri komin á Ólympíuleikana ef ég hefði verið í svona grunnskóla.“
„Ég hefði keyrt frá Selfossi til Hafnarfjarðar til að mæta í svona skóla eins og NÚ.“
„Það hefði breytt öllu fyrir mig hefði ég fengið að ganga í skóla eins og NÚ þegar ég var unglingur.“
„Það er mjög hvetjandi að umgangast fólk sem er á sömu línu í lífinu og maður sjálfur.“
04 Um NÚ
NÚ er grunnskóli fyrir 8.–10. bekk sem leggur áherslu á íþróttir, hreyfingu, heilsu og vendinám. Skólinn er viðurkenndur af Menntamálastofnun, starfar samkvæmt Aðalnámskrá grunnskóla og lýtur lögum og reglugerðum um íslenska grunnskóla.
Aðalaðsetur er við Reykjavíkurveg 50 í Hafnarfirði. Íþróttir eru kenndar í Kaplakrika og Bjarkarhúsinu, sund í Suðurbæjarlauginni, list- og verkgreinar í NÚ og í húsi Tækniskólans, og heimilisfræði í aðstöðu Flensborgarskóla.
Allt starfsfólk skólans með starfsheiti og netfangi.
Á síðunniSkóladagatöl 2025–2026 og 2026–2027 og stundatafla allra nemenda.
Á síðunniStarfsáætlun, umbótaáætlun og námsvísar allra námsgreina.
Á síðunniStefna skólans, lotukerfið, námsmat og hugtökin í NÚ.
Á síðunniMáltíðir dagsins, hádegisverður og matseðill vikunnar.
Á síðunniOpið námsefni um svefnvísindi í fimm hlutum.
Á síðunniÆfingar fyrir 8–18 ára, námskeið og skráning.
Á síðunniRannsóknir, ritrýnt efni og yfirlitsskýrsla Skólapúlsins.
Á síðunniSamráðsvettvangur skólastjóra og skólasamfélags, öll starfsár.
Á síðunniStjórn félagsins og fulltrúar í foreldraráði Hafnarfjarðar.
Á síðunniNemendaráð NÚ frá 2016 til dagsins í dag.
Á síðunniGísli Rúnar, Sigríður og Kristján Ómar — fólkið á bak við skólann.
Á síðunniÞessi gögn eru vistuð hjá Google og opnast í nýjum flipa, alveg eins og á eldri vef skólans.
05 Skólastarfið
Dagatöl og stundatöflur eru geymd í Google Sheets og Google Drive svo þau uppfærist jafnóðum hjá skólanum.
06 Áætlanir
Námsáætlanir byggja á hæfniviðmiðum Aðalnámskrár grunnskóla og eru aðgengilegar hér og á Namfus.is. Kennsluáætlanir breytast frá ári til árs.
Skólaíþróttir, list- og verkgreinar og viðburðadagatal eru talin upp á námsvísasíðu skólans en eru þar ekki tengd við skjöl. Þau bíða þess að skólinn birti gögnin.
Skólanámskráin byggir á aðalnámskrá grunnskóla og er nánari útfærsla skólans á þeim markmiðum sem hún setur grunnskólum. Hún á að spegla skólastarfið í NÚ eins og það er, sérkenni skólans og aðstæður. Námskráin er því eins og skólastarfið í NÚ í sífelldri þróun og tekur í framtíðinni breytingum samkvæmt því.
Almennan hluta námskrárinnar er að finna í tengli hér að ofan. Kennsluáætlanir breytast frá ári til árs og innihalda upplýsingar um það námsefni sem notað er hverju sinni, tímaáætlanir, verkefni og vægi mismunandi þátta námsgreinarinnar í námsmati. Í námskrárhlutanum er svo að finna þau markmið og hæfniviðmið sem við sækjumst eftir að ná í mismunandi greinum og árgöngum.
NÚ er skóli fyrir unglinga í 8.–10. bekk og þar er lögð áhersla á að nemendur beri aukna ábyrgð á sínu námi. Stefna NÚ er að efla sjálfræði nemenda og sjálfstæði í vinnubrögðum. Námsumhverfi nemenda er að stærstum hluta rafrænt. Allir nemendur fá netfang hjá NÚ og aðgang að Google Classroom umhverfi. Áhersla er lögð á einstaklingsmiðað nám.
Við gerð námsáætlana er miðað við hæfniviðmið sem tilgreind eru í Aðalnámskrá grunnskóla. Námsáætlanir eru aðgengilegar á heimasíðu skólans og á Namfus.is. Í öllum árgöngum unglingadeildar verður námsmati hagað samkvæmt matsviðmiðum aðalnámskrárinnar og einkunnir gefnar í bókstöfum og/eða með umsögn.
NÚ starfar eftir lotukerfi þar sem unnið er með þrjú námsfög í þrjár vikur í senn. Í lok hverrar lotu fá nemendur og foreldrar sent heim námsmat lotu ásamt yfirliti yfir mætingu.
Í NÚ er starfrækt nemendaráð sem skipuleggur félagslega viðburði ásamt skólastjóra og öðrum starfsmönnum. NÚ hefur þá stefnu að taka þátt í öllum félagslegum viðburðum og keppnum sem í boði eru hverju sinni. Allir nemendur sem gefa kost á sér til starfa að félagsmálum fá tækifæri til þess. Hefðbundnar uppákomur eru m.a. óvissuferð að hausti, vorferð, þorrablót, spurningakeppni grunnskólanna, skólahreysti og árshátíðin.
Nemendur 10. bekkjar fá að kynnast þeim námsleiðum sem eru í boði eftir grunnskólann. Framhaldsskólar halda kynningar og opin hús á vorönn. Námsráðgjafi skólans sér um að upplýsa nemendur og foreldra um kynningar á framhaldsnámi, tekur einstaklingsviðtöl við alla nemendur í 10. bekk og heldur stutt námskeið í námstækni.
08 Matur
Í NÚ leggjum við mikið upp úr því að nemendur borði holla fæðu með reglubundnum hætti yfir daginn. Allir nemendur og foreldrar fá fræðslu um næringarfræði og nemendur fá aðhald í því að hafa með sér hollt nesti.
Hádegisverðurinn er snæddur í NÚ en eldaður hinu megin við götuna í Tækniskólanum, þaðan sem okkur býðst afbragðs matur frá fyrirtækinu Smjattpatti ehf. Allur maturinn er eldaður frá grunni og því eins ferskur og heitur og hægt er hverju sinni. Hádegismaturinn er mjög fjölbreyttur og vel útilátinn. Tækniskólinn gefur sig út fyrir að vera heilsueflandi framhaldsskóli.
09 Betri svefn
Hér að neðan er hluti af námsefninu sem nemendur NÚ fara í gegnum í áfanganum „Íþróttavísindi“ þar sem við fjöllum m.a. um svefnvísindi. Öðru hverju yfir skólaárið fá nemendur að bera heilsuúr á sér í 5–7 daga þar sem safnað er upplýsingum um svefnvenjur þeirra. Þær upplýsingar hjálpa til við að auka meðvitund nemandans um sínar svefnvenjur og tengja við upplýsingar um áhrif svefns á geðheilsu og líkamlega heilsu.
Íþróttavísindin hjá NÚ eru kennd á vendinámsformi þar sem nemendur horfa vikulega á fyrirlestur, mæta svo í tíma og þreyta einfalt krossapróf sem kannar þekkingu nemandans á efninu, og restin af tímanum með kennara er svo nýttur í umræður um innihald hvers fyrirlesturs.
Þér er frjálst að nota efnið hér að ofan eins og það er. Óskir um að nýta efnið með breyttu sniði skulu sendar á kristjan@framsynmenntun.is.
10 Rafíþróttir
NÚ býður upp á metnaðarfullar rafíþróttaæfingar fyrir iðkendur frá 8–18 ára aldri. Æfingarnar fara fram í frábærri aðstöðu NÚ við Reykjavíkurveg 50 í Hafnarfirði.
Flest sveitarfélög í nágrenni Hafnarfjarðar veita frístundastyrk sem nýta má upp í æfingagjöldin. Umsjónarmenn rafíþrótta NÚ eru Daníel Örn Auðunsson og Ingólfur Sigurðsson.
Skráning – Sportabler (NÚ) Skráning – Sportabler (FH) Rafíþróttir NÚ á Facebook
Fyrir 8–16 ára á þriðjudögum og fimmtudögum milli 15:30–16:45 (hópur 1) og 16:45–18:00 (hópur 2). Námskeið í blönduðum hóp samanstendur af leikjaspilun í fjölbreyttu úrvali tölvuleikja. Hér er lögð mikil áhersla á hreyfingu og félagslíf samhliða spiluninni. Nemendur fá frelsi til þess að spila leiki undir þeirra áhugasviði og taka þátt í hópaspilun.
First person shooter á mánudögum og miðvikudögum milli 15:30–16:45 og 16:45–18:00. Hér stefnum við að bætingu nemenda í fyrstu persónu skotleikjum. Nemendur æfa samstillingu augna og handa, samskipti, snerpu, þrautalausnir og að sjálfsögðu líkamann í líkamsrækt NÚ. Nemendur munu koma til með að spila Counter-Strike, Fortnite, Overwatch, Valorant, Warzone sem og fleiri leiki.
Á föstudögum kl. 15:30–16:45. Á námskeiðinu er lögð áhersla á félagsskap, þrautalausnir og hreyfingu. Minecraft er tölvuleikur byggður á raunveruleikanum þar sem spilarar geta byggt, barist og eflt ímyndunarafl sitt. Nemendur verða að eiga aðgang að leiknum.
Rafíþróttadeild NÚ leggur áherslu á íþróttamanninn og hjálpar honum að sigrast á hindrunum til þess að ná árangri. Deildin áskilur sér rétt til þess að leggja niður námskeið náist ekki lágmarksþátttaka og/eða breyta tímum. Foreldrar eru beðnir um að hafa samband ef nemendur mega EKKI spila ákveðna leiki. Til viðbótar við reglubundnar æfingar eru fyrirhugaðir reglulegir félagslegir atburðir, mót og LAN-spilun á vegum Rafíþrótta NÚ. Námskeiðslýsingarnar hér að ofan eru þær sem skólinn birti fyrir vorönn 2023; nýjasta framboð hverju sinni er á Sportabler.
11 Fræðilegt
Hér er að finna ýmislegt gagnlegt efni sem okkur í NÚ finnst áhugavert og rímar við okkar hugmyndafræði.
12 Fólkið
Sautján manna hópur heldur utan um skólastarfið. Smelltu á netfang til að senda póst beint úr símanum eða tölvunni.
Netföng Arnrúnar og Irene vísuðu á rangan viðtakanda á eldri vefnum. Hér er notað það netfang sem skólinn birtir sjálfur í textanum.
13 Stjórn
Útskrifaðist með mastersgráðu í verkefnastjórnun árið 2015 og sem íþróttafræðingur frá Kennaraháskóla Íslands árið 2004. Hefur starfað sem grunnskólakennari frá árinu 1999 og hefur yfir 20 ára reynslu af þjálfun barna og unglinga. Er forvitinn, hefur mikinn áhuga á fólki, ferðalögum og sköpun. Elskar samverustundir með fjölskyldunni og íslenska náttúru.
Útskrifaðist sem þroskaþjálfi árið 1979 og lauk viðbótarnámi til BA-gráðu árið 2002. Lauk meistaragráðu í stjórnun menntastofnana árið 2009 og er viðurkenndur markþjálfi frá HR. Starfaði lengst hjá Svæðisskrifstofu málefna fatlaðra á Reykjanesi, sem forstöðumaður, starfsmannastjóri og framkvæmdastjóri stofnunarinnar til 10 ára. Mikil áhugakona um íþróttir og lýðheilsu almennt og stundar útihlaup sér til heilsubótar.
Hefur titlað sjálfan sig sem gleðileitara, forvitring, skólasmið og þjálfara. Hann eyddi sjálfur óhóflega mörgum árum í skóla og, kannski þess vegna, fékk eitt sinn þá flugu í hausinn að stofna íþróttagrunnskóla sem loks hóf starfsemi sína árið 2016 undir nafninu NÚ.
14 Ráð og félög
Við grunnskóla skal starfa skólaráð sem er samráðsvettvangur skólastjóra og skólasamfélags um skólahald. Skólastjóri hefur forgöngu um stofnun skólaráðs, situr í því og stýrir starfi þess. Auk skólastjóra sitja í skólaráði tveir fulltrúar foreldra, tveir fulltrúar kennara, einn fulltrúi annars starfsfólks skólans, tveir fulltrúar nemenda og einn fulltrúi grenndarsamfélags eða viðbótarfulltrúi úr hópi foreldra valinn af öðrum fulltrúum skólaráðs. Staðgengill skólastjóra stýrir skólaráði í forföllum skólastjóra.
15 Ráð og félög
Í NÚ er starfrækt foreldrafélag og hefur skólastjóri frumkvæði að stofnun þess og kosningu í félagið. Foreldrafélagið er skipað a.m.k. þremur foreldrum og skal kosning fara fram í september ár hvert og kosið til eins árs í senn. Félagið setur sér starfsreglur sem það vinnur eftir.
16 Ráð og félög
Nemendaráð NÚ skipuleggur félagslega viðburði ásamt skólastjóra og öðrum starfsmönnum. Allir nemendur sem gefa kost á sér til starfa að félagsmálum fá tækifæri til þess.
17 Umsagnir
Skólinn safnaði umsögnum nemenda og birti þær sem skjáskot. Hér eru umsagnirnar orðréttar og læsilegar.
11 Raddir nemenda
Nemendur í 8., 9. og 10. bekk skrifuðu þessar umsagnir í maí 2021 og maí 2022. Feitletrunin er þeirra eigin, eins og hún birtist í skjáskotum skólans.
Ef þú vilt metnað, farðu í NÚ!
Ef þú vilt góðan félagsskap, farðu í NÚ!
Ef þú trúir að þú sért íþróttamaður, þá átt þú heima í NÚ!
NÚ hefur bjargað mér sem íþróttamanni og námsmanni. Ég hef fengið ný og betri tækifæri og hef aldrei verið jafn hungraður fyrir árangur.
NÚ hefur hjálpað mér að vaxa sem manneskja og bætt hugarfar mitt mikið. Námið er þægilegt og býður upp á að fara á eigin hraða, íþróttirnar fjölbreyttar og valfög spennandi og fjölbreytt. Mikilvægast er þó andinn og traustið sem maður finnur frá kennurum sem nemendum. Ég hef kynnst fullt af skemmtilegu fólki sem ég mun halda bandi við og mæli með þessu fyrir hvern sem er.
Aldrei hefði mér dottið í hug að einhver grunnskóli myndi hafa svona mikil jákvæð áhrif á mig sem einstakling. Enda er þetta eitthvað allt annað en venjulegur grunnskóli. Þetta er NÚ!
Það sem mér finnst einkenna NÚ er stemningin og drifkrafturinn í starfsfólkinu. Maður finnur bara fyrir þessari sterku jákvæðu orku og hvað þau virðist elska það sem þau eru að gera. Og þegar rýmið fyllist af þessari orku er hægt að gera svo ótrúlega margt. Hún smitar svo út frá sér og hvetur fólkið í kringum sig áfram.
Það er þetta sem einkennir NÚ og fær mig til þess að virkilega vilja mæta í skólann fimm daga vikunnar og leggja mig fram.
NÚ er jákvæður og skemmtilegur skóli sem hentar flestum mjög vel. Kennararnir og nemendurnir eru jákvæðir og hjálpa manni við allskonar. Það er skipulagt nám og kennararnir vilja alltaf hjálpa manni. NÚ hefur hjálpað mér að hugsa meira um heilsuna mína, ég hef skipulagt mig meira og mér líður betur sem manneskjan sem ég er í dag.
Mér líður svo geðveikt vel í NÚ. Það eru allir kennarar svo jákvæðir og þeir veita þér alltaf aðstoð ef þér vantar hjálp. Vilja alltaf það besta fyrir okkur og hjálpa okkur að komast yfir hluti. Skólakerfið er líka svo frábært. Í stað þess að stressast yfir náminu erum við bara í þremur fögum í einu í hverri lotu og það einfaldar málin svo mikið. Ég hef eignast góða vini hérna, og það skiptir ekki máli hvað þú ert gamall/gömul, það er alltaf tekið jafn vel á móti þér. Ég mæli virkilega með þessum skóla.
Þegar ég byrjaði í NÚ var sjálfstraustið mitt ekki til staðar og minn helsti ótti var að standa fyrir framan fólk og kynna. En þegar ég fór í óvissuferðina ákvað ég að reyna eitthvað nýtt og vera opin og tala við alla, það gekk vel og sjálfstraustið mitt byrjaði að gróa. Við byrjuðum svo að kynna oftar fyrir framan fólk í skólanum og það var erfitt fyrst en svo þegar maður gerir það oftar verður það léttara. Núna er að kynna fyrir framan fólk eitt af því skemmtilegast sem að ég geri. Það segir dálítið til um hvernig Nú getur breytt lífum hjá fólki, ég get allavega staðfest það að NÚ hefur breytt lífi mínu bara til góðs. Heilt yfir er góð aðstaða til að læra hér í NÚ, námið er vel skipulagt og kennararnir eru skemmtilegir plús að maturinn er frábær.
NÚ er frábær skóli sem að hefur hjálpað mér mjög vel bæði í íþróttum og bara andlega. Mér finnst vera vel gert að hafa markþjálfa og styrkleikar NÚ eru gríðarlega margir. NÚ hefur til dæmis bara fengið mann til þess að leggja meira af sér og vinna sjálfstæða vinnu, mjög góðir kennarar og lætur mann líða vel.
NÚ hefur hjálpað mér mikið í íþróttinni minni, allir kennararnir eru frábærir og gefa öllum nemendum góða athygli. Það er líka mjög gott að byrja daginn á hugleiðslu.
Þetta er fínn skóli, einkunnirnar mínar hækkuðu þegar ég kom í þennan skóla og mig hefur gengið mikið betur í náminu. Kennararnir eru alltaf tilbúnir að hjálpa þér þegar þér vantar hjálp.
Nú er mjög góður skóli þar sem ég get lært á mínum hraða og kennararnir eru mjög næs.
18 Umsókn
Við hvetjum alla á aldrinum 12–15 ára sem hafa einlægan áhuga á íþróttum og heilsusamlegum lífsstíl til að sækja um hjá NÚ. Umsækjendur eru boðaðir ásamt foreldri eða forráðamanni í viðtal. Umsóknareyðublöðin eru þau sömu og skólinn notar í dag og opnast í Google Forms.
19 Spurt og svarað
Grunnskóli fyrir 8.–10. bekkinga sem leggur áherslu á íþróttir, hreyfingu, heilsu og vendinám. NÚ er viðurkenndur af Menntamálastofnun, starfar samkvæmt Aðalnámskrá grunnskóla og lýtur lögum og reglugerðum um íslenska grunnskóla.
Nemendur frá Hafnarfirði og Garðabæ greiða ekki námsgjöld í NÚ. Námsgjöldin skólaárið 2025–26 verða 29.900 kr. á mánuði í 10 mánuði fyrir nemendur úr öðrum sveitarfélögum á höfuðborgarsvæðinu. Sveitarfélög utan þess gætu haft ólíkan hátt á greiðslum til sjálfstætt starfandi skóla vegna nemenda sinna og gæti það haft áhrif á greiðsluþátttöku viðkomandi nemenda. Vinsamlegast kynntu þér fyrirkomulagið í þínu sveitarfélagi.
Við hvetjum alla á aldrinum 12–15 ára sem hafa einlægan áhuga á íþróttum og heilsusamlegum lífstíl til að sækja um hjá NÚ. Grunnreglan er sú að „fyrstur kemur – fyrstur fær“ en við áskiljum okkur rétt til þess að taka mið af búsetu, aldri, kyni og brautarvali nemenda. Umsækjendur eru boðaðir ásamt foreldri eða forráðamanni í viðtal. NÚ er lítill og fjölskyldulegur skóli með aðeins 100 nemendur og því eru að jafnaði aðeins teknir inn um 28–30 nýnemar í 8. bekk ár hvert, ásamt einstaka nemendum í 9. eða 10. bekk.
NÚ hefur sitt aðalaðsetur við Reykjavíkurveg 50 í Hafnarfirði. Íþróttir eru kenndar í Kaplakrika og Bjarkarhúsinu (bæði í stuttu göngufæri frá NÚ). Sund fer fram í Suðurbæjarlauginni. List- og verkgreinar eru kenndar bæði í NÚ og í húsi Tækniskólans, hinu megin við götuna, og heimilisfræði í glæsilegri aðstöðu Flensborgarskóla.
Rauði þráðurinn í öllu námi í NÚ er sjálfstæði og ábyrgð nemandans, þar sem nemandinn lærir að skipuleggja eigið nám og vinnu. Í NÚ er stundað mikið af vendinámi, þar sem innlögn kennara er fyrirfram aðgengileg á netinu svo hver og einn nemandi geti farið áfram á sínum hraða. Hver nemandi fær fartölvu til fullra afnota á meðan hann stundar nám hjá okkur. Í NÚ er kennt í lotum þar sem 3 námsfög eru tekin fyrir og hverri 3 vikna lotu lýkur með námsmati. Mikil áhersla er lögð á að halda nemendum líkamlega virkum gegnum skóladaginn og kyrrseta takmörkuð með ýmsum leiðum. Nemendur NÚ setja sér dagleg markmið um þá vinnu sem ljúka skal á hverjum degi og gera markmiðin upp í lok hvers dags.
Viltu vita meira um vendinám? Smelltu þá hér.
Allir nemendur NÚ fara í gegnum bóklegt námsefni sem hjálpar þeim að ná árangri sem íþróttamönnum. Mikið tillit er tekið til íþrótta- og keppnisiðkunar þeirra.
Nemendur á Akademíubraut sækja tækniæfingar hjá sínu íþróttafélagi tvisvar sinnum í viku á skólatíma. Brautin er í samstarfi við viss íþróttafélög í nágrenninu en aðeins eru í boði ákveðnar íþróttagreinar hjá ákveðnum íþróttafélögum.
Nemendur á Afreksíþróttabraut þurfa að æfa íþrótt hjá íþróttafélagi og hafa áhuga á því að bæta sig í sinni íþrótt. Nemendur á Afreksíþróttabraut þurfa ekki að vera orðnir afreksíþróttamenn, en búa yfir vilja til að verða slíkir í framtíðinni.